NOLA SUSTATU TOKIKO MAILATIK ZAINTZA SISTEMA IKUSPEGI FEMINISTATIK HOBETZEKO PROZESUAK?

24 - 11 - 07

NOLA SUSTATU TOKIKO MAILATIK ZAINTZA SISTEMA IKUSPEGI FEMINISTATIK HOBETZEKO PROZESUAK?

Galdera hori da 2022tik aurrera Berdinsarearekin batera egiten gabiltzan laneko ardatza. Berdinsarea, Berdintasunaren aldeko eta indarkeria sexistaren kontrako Euskal Udalen Sarea da eta 2006. urtean sortu zen EUDELen eta Emakunderen laguntzarekin, udal gobernuen maila goreneko konpromisoa bermatzeko. Berdintasunarekiko konpromisoan udalek duten ezinbesteko funtzioari jarraiki, bai maila politikoan zein teknikoan hausnarketarako espazioak eskaintzen ditu, eta politika publikoetan aurrera urratsak emateko baliabideak eskaintzen ditu. Norabide horretan, zaintzaren esparruan ere aldaketak sustatzeko apustua egin du. Izan ere, Euskadin, oraindik orain, iraupen luzeko zaintza lanak familien gain gelditzen dira eta horien barruan emakumeak dira lan zama handiena dutenak.

Horrek sortzen dituen bidegabekeriez kontziente, tokiko mailan politika eraldatzaileak sustatzeko prozesua abiatu zuen 2022an Emaginen laguntza teknikoarekin. EAEko zaintzaren esparruaren eta ordura arte martxan jarritako eraldaketa prozesuen gaineko mapeoa egin genuen lehendabizi proiektu honen baitan. Momentuko egoera zein zen hobeto ulertzeko informazioa esku artean izanda, tokiko administrazioentzat lagungarri izan daitezkeen oinarrizko irizpideak eta ibilbideak adosteari ekin genion ostean. Adituek egungo zaintza sistemari buruz dituzten iritziak aztertzen pasa genuen iazko ikasturtea eta horietatik abiatuta tokiko errealitatean eragiteko bide orriak diseinatzea izango da 2025eko erronka.

Gogoz gaude 2022. urtean hasitako bide honek emango dituen fruituak ikusteko.

EUDEL tokiko zaintza sistemak ikuspegi feministatik eraldatzen

Udalbiltzaren herri zaintzaileen inguruko hausnarketa prozesuaren dinamizazioa

24 - 10 - 22

Udalbiltzak herri zaintzaileen inguruko hausnarketa prozesuaren dinamizazioa

Udalbiltzak «Zer da herri zaintzailea?» galderari erantzuteko asmoz, hausnarketa prozesua jarri du abian. Helburuak bi dira: alde batetik, herri zaintzailea zer den eta zein ikuspegitatik eraiki behar den definitzea, eta bestetik, udal mailako esku-hartzeari begirako proposamena garatzea. Horretarako, Euskal Herriko luze-zabalean gaia jorratzen ari diren hainbat hautetsi, teknikari eta norbanako elkartuko dira.

Prozesu hau 8 saiok satuko dute eta apirilera bitarte luzatuko da. Pertsonen zaintza, lurraldearen zaintza eta zaintza gobernantzatik izango dira gai nagusiak. Prozesuaren emaitzak ezezagunak izan arren, oinarrizko bost ikuspegi ezarri dituzte premisa bezala: ekofeminismoa, antiarrazismoa, antikapazitismoa, adinkeria eza eta euskara. Hain zuzen, ideia horietatik abiatuta sakondu nahi da herri zaintzaileen gogoeta zabalean.

Emagin Elkarteak prozesuaren diseinu lanetan parte hartu du eta saioen dinamizazio lanaz arduratzen ari da.

Amatasunaren eta zahartzaroaren inguruko zaintza ibilbideak Zaldibin

24 - 01 - 17

Amatasunaren eta zahartzaroaren inguruko zaintza ibilbideak Zaldibin

Amatasunaren eta zahartzaroaren inguruko zaintza ibilbideak burutu genituen Zaldibian 2023ko udaberrian. Herriko talde feminista, Beti Gazte jubilatuen elkartea, Etxekoneko elkartea eta herriko udalaren laguntzarekin antolatu genituen ibilbideok. Lehenengoan, maiatzaren 24 izan zen eta bigarrena, ekainaren 3an.

Amatasunari buruz hausnartzeko, Parean elkarteak Atsolorra proiektuaren bueltan jasotakoak ezagutu genituen besteren aurretik, eta herriko emakume ezberdinen esperientziekin osatu genuen ibilbidea. Amatasun transnazionalen, ama bakarren edo ama lesbianen egoerak ezagutzeko parada izan genuen geldialdi bakoitzean.

Zahartzaroaren gaira hurbiltzeko, Kontxi Lopez (zaharren ahalduntze prozesuetan bidelagun) eta Nekane Berriotxoa (ONEKA plataformako kidea) izan genituen bidai lagun. Adinkeria eta emakume pentsionisten egoera izan zituzten hizpide. Arreta ereduaz jarduteko aukera ere izan genuen, egun dauden zailtasun eta erronkak ezagutuz Zaldibiako gizarte langilearekin batera. Azkenik, zaintza eta zahartzaroa gurutzatzen diren puntu horretan lanean diharduten emakume ezberdinen esperientziak aditu genituen: Zaldibiako etxez etxeko zerbitzuko langilearena, Zaldibiako etxeko langile batena, eta Beti Gazte taldeko kide batena.

Ibilbideak ekarpen aberatsa egin dute, batez ere, zaintzaren gaia gertuko errealitatera ekartzeko balio izan dutelako. Horrez gain, azpimarratzeko da ibilbideen bidez askoren arteko topaguneak sortu izana, sarri, ezkutuan eta ikusizeninean kokatzen den gai bat espazio publikoan kokatuz. 2024an jarraipena emango diogu lan honi, adinean nagusi direnen zaintza beharrak ezagutzeko diagnostiko bat eginez.

Udaberriko zaintza ibilbideen kartela instagramerako egokitua

Hernanin zaintzak erdigunera

23 - 05 - 11

Hernanin zaintza lanak erdigunera!

2022ko udaberrian Hernaniar talde batekin batera hasi genuen Hernanin zaintza lanen inguruko hausnarketa, 2020an aurkeztutako Beterri-Buruntzaldeako Zaintza Erregimenaren diagnostikoa eta ekintzarako proposamena lana erreferentzia gisa hartuta. Emagin Elkartea prozesu honen guztiaren bidelaguna izan da.

Hausnarketa prozesu horren emaitzak aurkezten dizkizuegu orain: batetik, manifestua, orain arte egin dugun hausnarketa kolektiboaren oinarriak biltzen dituena; bestetik, 2023tik aurrera martxan jarri nahi dugun ekintza plana. Biak ditugu Hernaniko zaintzen taldearen iparrorratz, zaintzak Hernaniko antolaketaren erdigunera ekartzeko.

Ekintza planaren helburuak:

Hernanik dituen zaintzarekin lotutako espazioak egonkortu.
Zaintza lanen gainean sentsibilizazio lana egin.
Artikulazio komunitarioa sustatu.
Zaintzaileen arteko guneak sendotu.

Maiatzaren 13an Zaintzak Erdigunera Eguna ospatuko dugu guzti hau gaintontzeko herritarrei aurkezteko, egitarau xume zein mamitsu batekin.

Egun berezi honetarako komunikazio euskarrien diseinua Emagin Elkarteak sortu ditu.

hernaniko zaintzen egunerako gonbidapena

Hernaniko zaintzen egunerako rollupa<br />

HERNANIN ZAINTZAREN BURUJABETZARANTZ

23 - 01 - 20

HERNANIN ZAINTZAREN BURUJABETZARANTZ

2020an aurkeztu genuen Beterri-Buruntzaldeako Zaintza Erregimenaren diagnostikoa eta ekintzarako proposamena lana. Hori abiapuntu izanik, Hernanin zaintza lanen gaineko hausnarketarekin jarraitzeko bideari ekin zitzaion, eta Emagin Elkartea izan da horretan bidelagun.
Covid-19a dela eta asko atzeratu behar izan zen Beterri-Buruntzaldeako Zaintza Erregimenaren diagnostikoa eta ekintzarako proposamena lanaren aurkezpen herritarra, eta horiek horrela, 2022ko apirilean egin genituen jardunaldiak Hernaniko Kulturarteko Plaza Feministan. Horrekin batera, eta adineko pertsonen bakardade egoera urgentziaz artatzeko asmoz, hainbat lan saio egin ziren 2021eko udaberritik udara bitarte, eta Auzozaintza egitasmoaren definizioa egin zen ondotik, 2021eko neguan martxan jartzeko.
2022ko udaberritik aurrera zaintza taldea sortu genuen. Askotariko eremuetatik datozen herritarrekin hausnarketa prozesua egin dugu, eta zaintzaren inguruko irakurketa komuna eraikitzeaz gain, 2023-2027rako ekintza plana zehaztu dugu, bereziki artikulazio komunitarioa sustatzeko eta zaintza zerbitzuak egokitzeko. Era berean, osatu dugun taldearen gainean hausnartzen ari gara. Zer garen eta nola nahi dugun aurrera begira antolatu erabaki behar dugu, Hernanin zaintza lanak burujabetasunaren ikuspegitik lantzen jarraitzeko.