Aurten ere Leioan indarkeria matxistaren prebentzio ez mixtoa landu dugu -Barandiaran, Betiko, Mesedeetan zein Adsis- ikastetxeetan. Neskekin autodefentsa feminista landu dugu, eta mutilekin, berriz,  maskulinitate berriak. Hala nola, genero desberdintasunaren inguruan hausnartu dugu, baita patriarkatuak gure jendartean dituen ondorioetan ere. Oro har, nesken ahalduntze pertsonal zein kolektiboan eta mutilen botere desjabekuntzarako bidean urrats garrantzitsuak ematen hasi gara.

 

2020/2021 ikasturtean zehar NABIk bultzatutako programa baten bueltan ari gara lanean. Nafarroako neska gazteen ahalduntzea helburu duten saioak prestatu eta dinamizatzen ari gara. Besteak beste Baztanen, Iruñean, Cintruenigon eta Agoitzen neska gazte taldeak osatu dira eta hilean behin elkartzen gara hausnartzeko, eztabaidatzeko eta sareak sortzeko.

 

Iruñeako Udalak festa eremu eta gaueko aisialdi pribatuan ematen diren eraso sexisten aurreko prebentzio eta ekintza protokoloa osatu zuen hainbat eragileekin batera, besteak beste, udaleko alor ezberdinetako teknikariak, Emakumearen udal zerbitzua, elkarte feministak, hostalarien hainbat elkarte, peñen federazioa, Gora Iruñea eta taberna zein festa areto ezberdinak.

Emaginetik, protokolo honen inplementazioa eta jarraipenaren lan teknikoa garatzen gaude 2019-tik. Bereziki protokolora atxikitzeko derrigorrezkoak diren formazio saioak ematen dizkiegu taberna edo festa leku bateko arduradun zein langile guztiei (tabernariak, segurtasunezko kideak, arropa zaintzaileak…), Iruñeako Peñei edota festibal batzuetan parte hartzen duten kideei (IruñeaRock, Flamenco On Fire). Honetaz gain, aholkularitza eta jarraipen lana egiten dugu urte osoan zehar

Dakigunez, indarkeria matxista ez dago gure gertuko elkarte mixto eta mugimendu sozialetatik at. Etxe barruan gertatzen dena kolektibo osoaren ardura izanik eta erantzukizun hortatik heldu dio Bertsozale Elkarteak barena mailako eraso matxisten protokolo bat sortzeko beharrari

Horregatik, Bertsozale Elkartean eman daitezkeen eraso sexistak kudeatzeko protokolo bat osatzeko lanetan gaude prozesu parte hartzaile baten bidez. Guztira profil ezberdinetako 90 lagun inguruk parte hartu dute: transmisio eragile, zuzendaritza kide, irakasle, koordinatzaile, lehendakaritza, borondatezko, bertsolari, Lankuko teknikari, administrazioa, komunikazioa, Xenpelar dokumentazio zentroa. Prozesuaren helburu zehatzak hauek liratezke:

• Indarkeria matxisten eta horiei aurre egiteko protokoloen inguruko oinarrizko formazioa jasotzea
• Protokoloa osatzeko egon daitezkeen elementuen inguruko eztabaidak ematea eta protokoloa zehazteko erabakiak hartzea
• Egiturako kide guztiek protokoloa ezagutzea eta bere inplementazioa barneratzea