2023ko abuztuan eraso matxistarik gabeko jaiak aldarrikatzeko eta erasoen aurrean jarduteko protokoloa aurkezteko agerraldia egin zuen Blusen eta Nesken Parekidetasun Batzordeak. 2015etan ekin zioten barne mailan eraso matxisten afera lantzeari eta dagoeneko, kide diren kuadrilla guztiek protokoloa beren gain hartzea eta aplikatzea lortu dute.

Barrura begirako lanketa horretan urrats bat gehiago eman dute orain, eta Blusa eta Nesken dinamika genero ikuspegitik aztertu dute. Emaginek Aztikerrekin batera sortu duen inkesta baten bidez burutu da azterketa hori. Arrakastatsua izan da egindako lana, aurreikusitako lagina gainditzeaz gain (401 kidek erantzun dute inkesta %95 baino konfiantza maila handiagoarekin), Blusa eta Nesken ikuspegiak eta dinamikak bistaratzea ekarri duelako, eta hori ikuspegi feministatik analizatzea izan da Emaginen lana. Kuadrilla ezberdinetako kideek feminismoarekiko daukaten ezagutza eta atxikimenduaren berri eskuratu da, batetik; eta, Blusa eta Nesken izaera definitzen duten alderdi ezberdinen analisi bat ere egin da, bestetik. Hala nola, lan eta ardura banaketa, kontziliazioa, parte hartzea, balio eta kultura, edo indarkeria jarri dira auzitan eta denetan ala denetan ematen diren errealitateak bistaratu dira analisian.

Lan honi esker, barne mailako dinamika nolakoa den eta zein iritzi sortzen dituen ezagutzeko parada izan dugu. Eta guzti hori ikuspegi feminista batetik aztertzean, aurrera begirako jardun feminista indartzeko eremu ugari hauteman dira. Hemendik aurrera bidea egiten jarraitu beharra dago, batez ere, inkestan azaleratu den gogo feminista, iritzietan ez ezik praktikan ere islatzeko.

Torturak ikuspegi feminista batetik aztertzen gabiltza. Iaz, torturatuak izan diren gertuko hainbat emakumek Emaginengana jo zuten feminismotik gai honi heltzeko beharra mahaigaineratuz. Emagineko lantaldetik hartu genuen erronka honi heltzeko konpromezua eta Olatz Dañobeitia dabil gurekin lanean buru belarri. Izan ere, berak gai hau jorratu du, beste batzuen artean, iaz aurkeztutako tesian: Militantzia eta errepresio politikoaren azterketa feminista bat: 90eko Ezker Abertzaleko emakumeen kasua.

Gure balioak jarraituz, kolektiboan egin nahi dugu prozesu hau. Horregatik, ordura arte egindakoa kontrastatzeko barne topaketa batzuk antolatu genituen abenduan eta Oreretan elkartu genituen torturatuak izan diren hainbat emakume, abokatuak, mugimendu feministako kideak eta gai hauen bueltan ikertu edo ikertzen ari direnak. Ekarpen horiek testuan integratu eta aurten liburua kaleratzeko asmoa daukagu. Horrekin batera, erreparazioaren inguruko jardunaldi ireki batzuk antolatuko ditugu udazkenean.

2024 urtean, Ikaztegietako emakume taldearen iniziatibaz, herriko emakume etorkinak ezagutzeko eta emakumeen arteko harremanak indartzeko prozesu batean egon gara murgilduta. Herrian hilean behin elkartzen joan gara eta gai ezberdinak landu ditugu talde mixtoan. Herritik zehar ibilaldia egin genuen, merendola bat, emakume batzuen migrazio prozesuak ezagutu ditugu eta Indarkeria Matxistaren bueltan hitz egiten aritu gara besteak beste. Hizkuntzak zainduz eta perspektiba feminista batetik emakumeen harremanak sustatu ditugu, kultur-trukaketari garrantzia eman diogu arrazismoaren begiradak mahai gaineratuz eta pribilejio zuriak azaleratuz perspektiba kritikoa lantzeko asmoz.

Ximurrak Xamur izeneko programak, Zaldibiako adineko emakumeen ahalduntzea sustatu nahi du. Elkar ezagutu, saretu, hausnartu eta formatzeko espazioak sortu ditugu. Adineko emakumeen trabakuntza eta ahalduntzerako tresnak garatu nahi dira, estereitipoak deseraikiz, lanak aitortuz eta elkarrekin saretu eta indartuz. Horretarako, zine forumak, liburuen bueltako solasaldiak, formazio saioak edota ekimen parte hartzaileak antolatu ditugu.