Jaietako komunikazio euskarriak

24 - 06 - 13

JAIETAKO ZERBITZUEN HEDAPENERAKO KOMUNIKAZIO EUSKARRIEN DISEINU LANAK

Herrietako festetan informazio eta sentsibilizaziorako guneak jartzearen aldeko apustua egiten dugu Emaginen, baina zerbitzu honen berri herritarrei ematea garrantzitsua da.

Zertarako diren Informazio gunea edo Arreta Puntua, zein informazio mota dagoen eskuragarri, non egongo den kokatua zerbitzua eta zein ordutegian, zein izango den telefono zenbakia…

Zerbitzua eraginkorragoa izan dadin, festen aurretik komunikazio kanpaina bat egitea da egokiena. Horretarako askotariko bide eta euskarri erabili daitezke. Guk hemen, adibide moduan, Abadiño eta Bergarako jaietarako prestatutako euskarriak aurkezten dizkizuegu.

Bergaran erasoen kontrako kanpainaren berri eman zuteneko albistea:

https://www.bergara.eus/eu/node/19578

Bergarako pegatina telefono zenbakiarekin

Berriatuko Udalaren politika feministak hobetzeko aholkularitza zerbitzua

24 - 01 - 17

Berriatuko Udalaren politika feministak hobetzeko aholkularitza zerbitzua

2022tik hona eskuz-esku ari gara Berriatuako politika feministak hobetzeko lanean Emagin Elkartea eta Berriatuako Udala. Urte horretan herriko gizon eta emakumeen egoeraren berri ematen zuen diagnostiko bat osatu genuen, eta baita zapalkuntzak ezabatzen joateko Berdintasun Plan berria ere.

Egun indarrean dagoen Berriatuako II. Berdintasun Planean jasotzen dira herriko genero desparekotasunak gainditzeko 2023-2026 aldian aktibatuko diren neurriak. Halaber, Berdintasun Plana aurrera ateratzeko baliabide materialak hobetzearekin batera, giza baliabideak hobetzeko erabakia hartu zuen Berriatuako Udalak, eta horren ondorioz hasi ginen Emagin Elkartetik aholkularitza zerbitzua garatzen bertan.

Urte bete pasa da aholkularitza zerbitzu hori ematen hasi ginenetik eta orain arteko ibilbidearen balantze positiboa egiten dugu. Azpimarratuko genuke tarte horretan Herriko Politika feministak modu parte hartzailean erabakitzeko Foro Feminista sortu dugula eta baita herritarren prestakuntza feminista sustatuko duen Eskola Feminista ere. Emaitzak ikusteko oraindik bide luzeago bat behar den arren, ziur gaude bi egitasmo hauek ekarpen sakona egingo dutela Berriatuako eraldaketa feministan.

Aipatu beharrekoa da ere prozesu hauetarako behar izan ditugun baliabide grafikoen diseinuak Emagin Elkartearen komunikazio lantaldeak sortu dituela.

2024an ere ilusioz jarraituko dugu Berriatuan lanean.

Amatasunaren eta zahartzaroaren inguruko zaintza ibilbideak Zaldibin

24 - 01 - 17

Amatasunaren eta zahartzaroaren inguruko zaintza ibilbideak Zaldibin

Amatasunaren eta zahartzaroaren inguruko zaintza ibilbideak burutu genituen Zaldibian 2023ko udaberrian. Herriko talde feminista, Beti Gazte jubilatuen elkartea, Etxekoneko elkartea eta herriko udalaren laguntzarekin antolatu genituen ibilbideok. Lehenengoan, maiatzaren 24 izan zen eta bigarrena, ekainaren 3an.

Amatasunari buruz hausnartzeko, Parean elkarteak Atsolorra proiektuaren bueltan jasotakoak ezagutu genituen besteren aurretik, eta herriko emakume ezberdinen esperientziekin osatu genuen ibilbidea. Amatasun transnazionalen, ama bakarren edo ama lesbianen egoerak ezagutzeko parada izan genuen geldialdi bakoitzean.

Zahartzaroaren gaira hurbiltzeko, Kontxi Lopez (zaharren ahalduntze prozesuetan bidelagun) eta Nekane Berriotxoa (ONEKA plataformako kidea) izan genituen bidai lagun. Adinkeria eta emakume pentsionisten egoera izan zituzten hizpide. Arreta ereduaz jarduteko aukera ere izan genuen, egun dauden zailtasun eta erronkak ezagutuz Zaldibiako gizarte langilearekin batera. Azkenik, zaintza eta zahartzaroa gurutzatzen diren puntu horretan lanean diharduten emakume ezberdinen esperientziak aditu genituen: Zaldibiako etxez etxeko zerbitzuko langilearena, Zaldibiako etxeko langile batena, eta Beti Gazte taldeko kide batena.

Ibilbideak ekarpen aberatsa egin dute, batez ere, zaintzaren gaia gertuko errealitatera ekartzeko balio izan dutelako. Horrez gain, azpimarratzeko da ibilbideen bidez askoren arteko topaguneak sortu izana, sarri, ezkutuan eta ikusizeninean kokatzen den gai bat espazio publikoan kokatuz. 2024an jarraipena emango diogu lan honi, adinean nagusi direnen zaintza beharrak ezagutzeko diagnostiko bat eginez.

Udaberriko zaintza ibilbideen kartela instagramerako egokitua

EAEKO EMAKUMEEN ETXEEN INGURUKO ERRADIOGRAFIA (2023)

23 - 06 - 22

EAEKO EMAKUMEEN ETXEEN INGURUKO ERRADIOGRAFIA (2023)

Gela bat norberarentzat aldarrikatu zuen 1929an Virginia Woolf idazleak eta Hego Euskal Herriko Mugimendu Feministak jarraitu zion lorratzari. Frankismoaz geroztik, emakumeen arteko elkargune edota espazio propioen aldarrikapena etengabeko bat izan da gertuko mugimendu feministan.

Batzuk, ibilbide luzea dute eta beste batzuk, berriz, berriki ireki dira. Bakoitzak bere izaera du, bere antolatzeko modua, bere finantzazio sistema, bere instalazioak. Bakoitzaren singulartasun horretan bada komun ugari, ordea. Hain zuzen, txosten honetan esperientzia eta praktika horietatik abiatuta Emakumeen Etxeetako errealitate, indargune eta erronkak identifikatzen dira. Horretarako, espazio horietako subjektu printzipalekin egon gara: dinamizatzaile eta erabiltzaileekin.

Bertan jasotakoak Bilboko Galtzagorri elkarteak bultzaturiko prozesu baten barruan kokatzen dira zeinaren motibazioa Bizkaiko hiriburuko emakumeen beharrak asetzen laguntzeko berariazko espazio bat diseinatzea eta gauzatzea den. Emakundek diruz lagundutako ikerketa honetan, EAEko 9 Emakumeen Etxeetako esperientziak jasotzen dira. Lagina mugatua izan arren, gaur egun 15 Emakumeen Etxe baitaude EAEn, ikaspen orokor batzuk ateratzeko baliagarri da.

Informazio gehiago nahi izanez gero: TXOSTENA ikusi

EAE emakumeen etxeen erradiografiaren helburuak

Hernanin zaintzak erdigunera

23 - 05 - 11

Hernanin zaintza lanak erdigunera!

2022ko udaberrian Hernaniar talde batekin batera hasi genuen Hernanin zaintza lanen inguruko hausnarketa, 2020an aurkeztutako Beterri-Buruntzaldeako Zaintza Erregimenaren diagnostikoa eta ekintzarako proposamena lana erreferentzia gisa hartuta. Emagin Elkartea prozesu honen guztiaren bidelaguna izan da.

Hausnarketa prozesu horren emaitzak aurkezten dizkizuegu orain: batetik, manifestua, orain arte egin dugun hausnarketa kolektiboaren oinarriak biltzen dituena; bestetik, 2023tik aurrera martxan jarri nahi dugun ekintza plana. Biak ditugu Hernaniko zaintzen taldearen iparrorratz, zaintzak Hernaniko antolaketaren erdigunera ekartzeko.

Ekintza planaren helburuak:

Hernanik dituen zaintzarekin lotutako espazioak egonkortu.
Zaintza lanen gainean sentsibilizazio lana egin.
Artikulazio komunitarioa sustatu.
Zaintzaileen arteko guneak sendotu.

Maiatzaren 13an Zaintzak Erdigunera Eguna ospatuko dugu guzti hau gaintontzeko herritarrei aurkezteko, egitarau xume zein mamitsu batekin.

Egun berezi honetarako komunikazio euskarrien diseinua Emagin Elkarteak sortu ditu.

hernaniko zaintzen egunerako gonbidapena