EAEko eskolen diagnosia

22 - 02 - 08

EAEKO ESKOLEN BERDINTASUN EGOERAREN DIAGNOSTIKOA

Emakundek etorkizun hurbil batean gida bat sortu nahi du, eta horren bidez eskolei diagnostikoa eta berdintasun/hezkidetza plana egiteko eta kontuan izan beharreko beste atal batzuk lantzeko gidalerroak eskaini nahi zaizkie. Gida hori ikastetxeentzat ahalik eta baliagarriena izan dadin, beharrezkoa da ezagutzea egun zer-nolako errealitatea dagoen, zein den egiten den lana, zer ez den egiten eta zeintzuk diren aldeko eta kontrako faktoreak.

Beraz, ikerketa honen helburua EAEko eskoletan, berdintasunaren lanketari dagokionez, gaur egun duten egoera erreala ezagutzea da; hau da, berdintasunaren txertaketa maila zein den jakitea, baita berdintasuna landu duten eskolek nola egin duten, zer baliabide erabili dituzten, norekin egin duten eta zer zailtasun izan dituzten ere.

Ikerketa hau aurrera eramateko elkarlanean ari gara honako eragileak: Aztiker Soziologia Ikergunea (inkestaren diseinu teknikoa egiteko arduraduna, eta atal kuantitatiboan landa lana aurrera eraman eta datuen jasoketa eta oinarrizko ustiaketarako arduraduna), Emagin Elkartea (atal kualitatiboan landa lana aurrera eraman eta datuen jasoketa eta oinarrizko ustiaketarako arduraduna) eta Mireia Delgado Exposito.

SAIAZ MANKOMUNITATEKO BERDINTASUN PLANAREN EBALUAZIO PROZESUA

21 - 01 - 02

SAIAZ MANKOMUNITATEKO BERDINTASUN PLANAREN EBALUAZIO PROZESUA

2018ko urritik 2019ko martxora SAIAZ mankomunitateko I. Berdintasun Planaren Ebaluazioa egin zuen Emagin Elkarteak. Bertan jasotako informazioa aintzat hartu eta sakontzeko helburuz, II.Berdintasun Plana (2020-2024) egiteko prozesua abiatu genuen. Prozesu hori 2019ko irailean abiatu zen eta 2020ko martxoan eman genuen bukatutzat. Bertan datozen lau urteetan Saiaz mankomunitatea osatzen duten lau udalerrietan ekintzak planifikatu ditugu, gobernantzarako, balioak aldatu eta emakumeak ahalduntzeko, gizarte antolakuntza erantzukiderako eta emakumeen aurkako indarkeria desagerrarazteko. Era berean, Berdintasun Foroa sortzeko prozesua erraztu genuen eta hilabetez hilabete saioak egin ditugu.

Topaguneko berdintasun diagnostikoa, barne plana eta erasoen protokoloa

20 - 01 - 14

TOPAGUNEKO BERDINTASUN DIAGNOSTIKOA, BARNE PLANA ETA ERASOEN PROTOKOLOA

Euskaltzaleen Topaguneak gizon eta emakumeen arteko berdintasunaren aferari heltzeko erabakia hartu du, ahal den neurri eta denboretan. 2018an erakundeko langile guztiek oinarrizko formazio saio batzuk jaso zituzten, guztira 12 orduko formazioa. 2019an erakundearen diagnostikoa genero ikuspegi batetik egitea izan da helburu nagusia. Prozesu honetan, elkartearen parte diren 30 langile inguruk parte hartu dute. Erabili dugu metodologia kuantitatiboa eta kualitatiboa izan da: dokumentuen analisia, hiruko elkarrizketak eta galdeketa anonimoak (on line). 2020. urtean, ateratako ondorio eta proposamenetatik tiraka, ekintza plana egiteko asmoa dugu saio parte hartzaileen bitartez.

Honetaz gain, errealitatean agertu diren behar eta erronkei aurre egiteko tresna eta formakuntza falta ikusita, eraso matxistak kudeatzeko protokolo bat osatzeko hautua egin dute. Horregatik, indarkeria matxista eta protokoloen inguruko formazioak emateaz gain, protokolo eredu bat sortzen ari gara saio parte hartzaileen bitartez Topaguneko egiturako langileekin eta 3Blai, Mintzapraktikak eta Mintzakokoko dinamizatzaile eta langileekin batera.

AEK-KO BERDINTASUN DIAGNOSTIKOA

20 - 01 - 13

AEK-KO BERDINTASUN DIAGNOSTIKOA

AEK (Alfabetatze Euskalduntze Koordinakundea) 1976an sortutako erakundea da. Euskararen zabalpena eta irakaskuntza sustatzen ditu Euskal Herriko zazpi herrialdeetan, bereziki pertsona helduengan. Gaur egun 490 langilez osatuta dago, hauetatik 310 emakumezkoak eta 180 gizonezkoak dira.

AEKren sorrera eta bilakaera jendarte androzentriko baten baitan kokatzen dela. Ondorioz, ez da harritzekoa AEK, beste erakunde askok bezala, balore eta funtzionatzeko modu androzentrikoak birproduzitzea. Orain arte, ez da berdintasun planik egin eta zentzu horretan hainbat hutsune sumatzen da. Horren aurrean, barne nahiz kanpora begira emakumeen eta gizonen arteko berdintasuna bermatzeko eta bultzatzeko asmoz, diagnostiko eta ekintza plan egin nahi dute

AEKn generoagatik dauden bereizkeria eta diskriminazio egoeren gaineko diagnostikoa egiteko metodologia ezbedinak erabili ditugu, besteak beste, dokumentuen analisia, talde eztabaidak eta banakako galdeketa anonimoak (on line). Honekin batera, emakumeen ahalduntzea bultzatzeko saioak burutu ditugu AEK-ko emakume langile guztiekin

Zaintza lanen demokratizaziorantz: Beterri-Buruntzaldeako diagnostikoa eta ekintza plana

20 - 01 - 13

ZAINTZA LANEN DEMOKRATIZAZIORANTZ: BETERRI-BURUNTZALDEAKO DIAGNOSTIKOA ETA EKINTZA PLANA

Orain dela pare bat urte abiatu genuen Beterri-Buruntzaldeako eskualdean zaintza lanak demokratizatzeko prozesua. Hasiera batean, eskualdeko berdintasun teknikari, enplegu teknikari eta elkarte feminista zein arrazakeriaren kontrakoekin osatu genuen Foro Feminista deitutako espazioa. Bertan jardun genuen proiektua zein izan zitekeen hausnartzen, eskualdeko beharrak identifikatzen eta ekonomia feministan formatzen. Zaintzarena ez da gai sinplea; izan ere, hari mutur asko ditu eta zaila da zehazki zertaz ari garen adostea. Mugimendu Feministan oraindik ez dago argi zeri buruz ari garen eta demokratizazioak zein bide orri duen.

Jakinik zaintza erregimena guztiz iraultzea, jendartea errotik aldatzea dakarrela urgenteen diren eremuetan zentratuko gara. Eskualdeko zaintza erregimena zein den identifikatu nahi dugu eta horren barruan zaintzaileek (bai profesionalek zein ez profesionalek) duten egoera ikustarazi nahi dugu. Zaintzari buruzko iruditeriak eta zentzuak ezagutzea, zaintzaileen egoera eta beharrak ezagutzea, zaintza lanak sozializatu eta kolektibizatzeko bideak urratzea eta zaintza lanetan daudenen aitortza eta ahalduntze prozesuak bultzatzea dira ikerketa lanaren helburuak.

Horretarako eskualdeko argazkia osatuko dugu eta behar nagusien gainean aldaketa proposamenak bilduko dituen ekintza plana zehaztuko dugu, Beterri-Buruntzaldeako eragile sozial eta politiko nagusiekin.

Emagin_beterri-buruntzaldea_publikazioa